رحله إلى جهنـــم

واحد صاحبى دعانى ف حفله وقاللى ضـرورى تشّرف فيها

سهرة مغنى وحاجه لطيفه عشان نتهنى وننعــــــم بيهــــــــا

قلت يا صـــاحبى أنا متشكر ع الدعوه دى ولازم أجيهـــــــا

رحت الحفله وقلت دى لازم حفلــــة مغنى وحاجه وجيهــــه

رحت لقيت الكل بيسكر جنبـــه كاســــاته وبيعبيهــــــــــــــا

ــــــــــــــــــــــــــــــــــــــــــــــــــــــــــــــــ

شفت الكل كبير وصغّير نازل شــــرب وشــــرب بهمّــــــــه

قلت ليلتكم والله يابعدا ح تبقى بلون الحبر وضلمـــــــــــــــــه

قلت أستأذن جم حاصرونى وقفت لوحــدى ف وســــط اللّمــه

دا من يمّه يقوللى اتدردح دا انـــــــت باينك لبخـــــه ولخمــه

ودا من يمّه يقول قيم كاسك ياللا ومز بحتة لحمـــــــــــــــــــه

ــــــــــــــــــــــــــــــــــــــــــــــــــــــــــــــــــ

قلت أنا بدى اصارحكـوبقولتى الخمر مضـــره وقلــــــة قيمــه

ضحكوا وقالوا لازم واحد باعتك تشـــــــبع فينـــــــــا شتيمـــه

واللى يقوللى دى ليلة أنس وكاسها يخللى الفرحــــــــه عظيمه

واللى اتدروخ قاللى استذوق خللى ليلتنا تعدى سليمــــــــــــــه

إلا و واحد جاب لى قزازه و واحد جاب لى وراه بريمـــــــــه

ـــــــــــــــــــــــــــــــــــــــــــــــــــــــــــــــــــــــــــ

قلت أنا حالف ما اشرب عمرى طول ما انا عايش صنف الخمره

قالوا يا سيدنا ولو كاس واحد نحيّى صــاحبنا وتحلى السهــــــره

مالك سايق ليه ف عنادك هىّ خلاص الكلمه مسوجــــــــــــــره

رحت فاتحها وقلت اهى ليله تفوت وتعدى وزى ما يجــــــــــــرا

رحت مكيّل كاس واتنين و تلاته وسبعه وتسعه وعشـــــــــــــره

ــــــــــــــــــــــــــــــــــــــــــــــــــــــــــــــــــــــــــــ

بعد ما تم الشرب ودخنا بدأنا ف وصلة رغى كــــــــــــــــــــــلام

جبنا ف سيرة النار والجنه قلت جهنم دى أوهــــــــــــــــــــــــــام

لعبت بيّا الخمره كفرت وأصل الخمره رسول إجــــــــــــــــــــرام

لأ والأعجب من دا ومن دا إن ما حدّش قاللى حـــــــــــــــــــــرام

بل بالعكس قالولى كلامك شهد مكرر كلـــــــــــــــــــه تمــــــــــام

***************************************

رحت البيت عمّال باتطّوح ماشى مدهول وانا تعــبان

جسمى مكسر عقلى مبرجل ماشى اتخّبط فى العمدان

رحت البيت وكأنى بقالى أيام وشهور وسنيـــن عيّـان

نمت ازاى وانا لابس البدله شىء مش فاكره ولا دريان

نايم رسمى لأ والمدهش لابس الجزمه ف رجلى كمــان

ــــــــــــــــــــــــــــــــــــــــــ

شفت ف حلمى ملاك له هيبه وباين إنه ملاك جبــار

لما شاورلى وقاللى تعالى اتلخبط عـــقلى ولّف ودار

قاللى انا عايزك قلت أفندم ؟ قاللى نحصّل سـوا مشوار

قبل ما اقول له جنابك ميــــن ؟؟ سبّق هو بكل وقــــار

قاللى انا مالك قلت وظيفتك ؟ قاللى ريّس حـــرس النـار

ــــــــــــــــــــــــــــــــــــــــــــ

قلت له مرحب بيك فهمنى مشوار ايه ح نروحه كمان

انا بصــــراحه جسمى مكسّـــر فعلا فعلا أنا تعبـــــان

بس عافينى الليلــــه وبكره ح البس جبّه مع القفطــان

قال ح نروح مشوارنــا الليله من غيــر لفّ ولا دوران

حتمــا لازم تيــجى معايــا نتفســـح جـــوا النــــــيران

ـــــــــــــــــــــــــــــــــــــــــ

قلـــت النـــار ح اتفســح فيها ؟؟ لأ ولأ وألف محـــــال

أنا أتفســح جوا جهنم ؟ وامشى كمــان وسـط الأهـــوال ؟؟

قال ما تخافشى ما دام ويايا محال ح يصيبك شىء بطّال

خدنى وطفت معاه على ناس على جمـر النار بتشوف أهـوال

اللى بيصرخ واللى بيلطـــم واللى آلامــــه تهـــــد جبـــال

ــــــــــــــــــــــــــــــــــــــ

جه على واحد ناره قويه ومالى الجو صراخ وعــويـــل

قاللى دا مجرم كان فى الدنيا ف قتل النفس مالهشى مثيــل

لما يصمـــم يقــــتل واحــــد الصبحيــــه يـــلاقوا قتيـــل

راح فى محاكم غالط فيهــا بصــف شهـود وبألــف دليل

جه فى الآخره وصادفه جزاؤه وهنــا فى الآخره مافيش تضليل

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

ودا كان راجل قاسى وظالم عاش فى الدنيا ما لهشى ضمير

كان بيطلّع مال بالفـــــــايظ مـــــن رحمه بربح كتيــــــــــــر

كان جـــلاد وغرامــه يعـــذب كــل قليــــل المــال وفقيـــــر

اللى يكون محتـاج لفلـوسه بعيــش طـول عمـره ف ذلّه أسير

جــه فى جهنم ربّــك ذلّــه وأصــل الظلـــم حســـابـه عسيـــر

ـــــــــــــــــــــــــــــــــــــــــــــــــــــ

ودى كــان جوزهـا بيخلص ليهـا وكانـت هــى شيطـان غدّار

باعــت ودّه وخــانت عهــده وخلّـت عيشتــه مــرار فى مرار

هــو رعــاهــا بعطفــــه وهــى جلبــت لــه ولإسمـــــه العـار

طاوعـت طيشهـا طوتهـاالموجه وبحر الطيش دامالهشى قرار

ماتت فاجــره ونــــار الآخره دى وعـــد الخـــالـق للفـجّـــــار

ــــــــــــــــــــــــــــــــــــــــــــــــــــــ

ودا وصّــوه على خمسه يتامى قرايبه وكانوا ولاد قاصريــــن

حـــب المــال نسّــاه الرحمـه مــدّ ايديــــه لفلـــوس مســــاكيـن

بــدّد مالهــم ضيّـــع حالهــم لاجــل يربـــى ف ملــــك وطيـــن

سابهــم طول العمـــــر حيارى ف ذل وضيقه ويشكوا لميـــــن

جــه فى الآخـــره ونــار الآخــره شديده وحاميه على الظالمين

ـــــــــــــــــــــــــــــــــــــــــــــــــــــــ

ودا كان تاجــر بـــــس ميزانـــــه كان بإيديــه دايمــا خســـران

ربّنــا قال ف كتــــابه المحكــم اوعى تخّســــر فـــى الميــــزان

خالــف أمــر المولــى تعــالى يعـــنى حرامــى ولــــص كمــان

ياكل حـــق النـــــاس بالغــــش وخد فـــــى الغش وسام ونيشان

جـــه فى جهنــــم يلقــــى جزاؤه مهــــل وسحـــل وأكله نيــران

ـــــــــــــــــــــــــــــــــــــــــــــــــــــــ

ودا كان حـــــاكم عـــنده رعيّـه شافــــت منه الويــــل أشكــــال

شعبــــه جعــــان مش لاقى اللقــــمه وهوبيجمــــــع فى الأموال

إســــتبدادى بمــــعنى الكلمــــه وأى كلام مـــن غيـــره ضــلال

ياما سجــــون مع قطـــع رقاب كان على بلـــده وشعبه وبـــــال

هنا فــــى جهنــــم وســــط النار بعــــد العــــز يشـــــوف إذلال

ـــــــــــــــــــــــــــــــــــــــــــــــــــــــــــــــــ

ودا كان لص خطـــــير وبينهب بدل المال ف عروض النـــاس

كان له ضحايا سلبـــــــــها شرفها خدعها بوعد مالهشى أســاس

غرّر بيـــــــهم لاجل مزاجــه ماهو فى الأصــــل خسيس هلاس

عمره ما راعى الحرمـــــه ف مرّه طبق الأصل كمـــا الخنـــاس

هــــنا بيعيش فى الــــنار و مخلّـد أكله وشربه المهـــــل ف كاس

**************************************

أما الراجل دا ملعون عاش طول عمره ومات كذّاب
لما يقابلك و ح تسمع له كل سؤال له عنده جـــــواب
عمره ما يصدق أبدا أبدا أصل الكدب ف دمــه مذاب
يا مشاكل غرّق فيها الناس بالكدب وكان مغتــــــــاب
والكداب دا يبقى حسابه هنـا فى جهنـم ضعـف عذاب
ــــــــــــــــــــــــــــــــــــــ
ودا كان راجــــل فاســــد جدا كل حياته قمار فى قمـــار
ياما الناس نصـــحوه وقــــالوا له إن الميسر آخره دمــار
ولا كان يقـــــبل أى نصيحه يعنى مــع سبــق الإصــرار
كان بيخرّب دور عمــرانه وكان فى الغــش قوى وجبــار
ياما وغش الناس فى الدنيـا وهنــا فى الآخــره مكانه النار
ـــــــــــــــــــــــــــــــــــــــــــ
ودا كان قاضى وظيفته بيحكم بين الناس بما يرضى اللــه
ضـيّـع نفســـــه لما ضمــيره ضـل طريقــه منـــه وتــــــاه
مشى فى طريق الرشـــوه وأصبح يحكم كما إبليس وصــاه
ينصـــر ظالم عــلى مظلــوم لمــا مـــيزان الحــق رمـــــاه
جه فى الآخــره فى قلب جهنـــم وآدى إبليس بالمره معـــاه
ـــــــــــــــــــــــــــــــــــــــــــــ
ودا كان راجل خان العهــد وخــاه الأهــل وخــان أوطانه
باع أسرار الوطــن الغالى اللى اتربّــى ما بيــن أحضانــه
وطنه إدالــه حقوقـه الكامله ولكــن رجــع الندل وخــانــه
يعنى جاسوس على أهله وناســه وجدد للأوطــان أحــزانه
جه فى الآخــره ولاجل خيانتــه تبقى جهنم هى مكانــــــــه
ـــــــــــــــــــــــــــــــــــــــــ
ودا كان راجل عاش فى الدنيا صاحب فكر وعلـــم غزيــر
كان عــلاّمــه بألف علامه فى التشريع أو فــــى التفسيـــــر
ضــنّ بعلمه على المخاليـــق دفن العلــم فى بطـــن البيــــر
كل النــاس محتاجــه لعلمـــــه لكن كان فــى البخـــل أميــــر
جه فى الآخــره وخــش جهنـــم يعنــى عقــابه نــار وسعيــر
ـــــــــــــــــــــــــــــــــــــــــــ
ودا كان راجل عاش طول عمره ما يعرف أبدا حـق الجيــره
راجـــل مؤذى لكل جـــــيرانه وكان للشـــر بحـــاله خميـــره
كان بيوقّـع بـــين دا وبيــن دا ويـزرع بينـــهـم حقــد وغيره
كــل جيرانه اتلســـعوا بناره وصبح الكل ف أمــره ف حيـره
جه فى جهنم صادفه جزاؤه ما هى بلاويــه فى الدنيــا كتيره

قلت يا مالك بس كفايـه مش مستحمل دا انا إنســـان

قاللى تعالى وشوف بالمره تعذيب أكتر من دا كمان

قلت كفايه أنا قلبى إتقطّـع أنا بنى آدم مش صــــوّان

قال دى جهنم و ف قوانينها ما تلقاش أبدا لفـظ حنان

كل جريمه وليها عقابها وكل خطيّــه وليهــــا ميزان

ـــــــــــــــــــــــــــــــــــــــــــ

بعد شويه دخلنا ف وادى برده القاســــــى ما لهش مثال

شفت ف وسط عواصفه وبرده شخص بيبكى كإنه خيال

منظر مؤلم لمــا شـاهدتـه خاننّى الدمع فى عينــى وسال

قبل ما أسأل قاللى دا كافر كذّب ربّــه فى كــــل مــا قال

كان بيقول ع النار والجنه مجــرد وهــــم ومحـض خيال

ــــــــــــــــــــــــــــــــــــــــ

عايز الحــــــــــق أنا خفت وقلت أزوّغ منـــه احســــــن لــــى

قاللى استنى .. صحيت م النوم مفزوع وانا باصرخ جريم أهلى

جم سألوتى ليــه أنا باصرخ ؟.. رحت حاكيلهم ع اللى حصل لى

واللى شاهدته بعينى فى حلمى شفته ساعتهــا بقلبـــــى وعقلـــــى

قلت يا رب خلاص راح أتوب لك .. شفت بعينى ما حدّش قال لى

***********************************